1 Corinthians 3
Lavasaxaruki At Ne Moroa
1Luvutnetak mi luvurinuk. Gano nia aga vot pasa nemi, miga lok ngan mun lengkadede, lunuunu atnemi dom Korin goxovisi ru matmatkun. Kuren la levelinga rak tinimi xopmen goxo lok ngan lempapaase rinedi digara siam ka vam Loroonan Kaala kusu nam gomgo nga di. Kopmen, nia aga paase rinimi ngan ta nemi limixin mede at na lavatbung menemen, atla lunuunu atnimi xovisi goxo lolos, ga lok ngan mun lunuunu at lengkadede. 2Lengkadede di inin mene levendan tus la kopmen dina anan levempanga anan i lolos. La nemi migak lok bok kuren, mila mi goxot kis gagas ti levelinga mumuat tarak. La ise nga mo kovisi mina gagas tin, 3mila nemi move mi rooro ngan limixin mede at na lavatbung menemen. Levereven peves mi levenekarakat move i nemen kantubu atnimi, la nai i lox asuusu i do nemi move mi rooro eburu mi loklok at na lavatbung menemen; la kerepmo loklok atnimi i lok ngan loklok at limixin at na lavatbung menemen. 4Mi vetep amisik mi levelinga xantubu atnimi, lentaba di lok do, “Nema at ne Pol,” la lentaba di lok do, “Nema at ne Apolos.” Mi lok ngan tinotno limixin at na lavatkangka.5Ua lavasuun teren la nemi mi epaxara nema mi ne Apolos? Nema mun luasaxaruki at ne Moroa; maga tong asu Lagale Lavavang tinimi la miga nuunu ren. Nema buru ma lok mun leven gugu Leeme Silok ga raba nama min. 6Nenia agatlotlo li levelinga at ne Moroa xeneng at lorooro atnimi; la ne Apolos ga soli dan at nom levelinga, ketla ne Moroa axa ga lox asuusu nom levelinga xeneng at lorooro atnimi. 7Laradi itlotlo la laradi i soli dan, nedu xopmen duna silok. Ne Moroa xusuk mun i silok, mila neni i lox asuusu nom levelinga xeneng at lorooro atnimi. 8Mo lara itlotlo la mo lara i soli dan, nedu du epovo mun, la nedu getgesara duba lok ka luunun naba epovo at lugugu atdu, 9mila nema eburu mun luradi gugu at ne Moroa la nemi mi lok ngan laxantaamang teren. La nemi bok mi lok ngan loogu, ne Moroa ga vaxaru i.
Moroa Naba Lok Tong Pen Lugugu Atdik
10Moroa ga raba ia mi lakleklen kusu ana lok lugugu avukat; la kerepmo aga lok lugugu xantubu atnimi, i lok ngan laradi akleklen at lixipkip gu, la aga vaxaru li laabuxumpio at loogu, la lentaba vetpes dip kip gu mavana ren. Ketla nedi xa dina lok tatao avukat di xusu dina lok lugugu avukat. 11Ne Moroa gara lok li vam ne Iesu Karisito xusuk mun, neni laabuxumpio, la kopmen bok ba taabuxumpio vetpes tara naba lok li i. 12Mavana at na laabuxumpio lentaba luvuttadi diba xip gu mi lempanga ngan logol, lisiliva kopla levenuat mi luunun teren i silok. La lentaba diba xip gu mavana at na laabuxumpio mi levenuna gamasa, la lempivilis kopla levenbeo mun. 13At laaleng ete, ne Moroa naba lox asuvos ba luruturun at leven gugu at limixin getgesara, i lok ngan ta di lok tong pen leven gol at laxao, la kerepmo ne Moroa naba lok tong pen bok lugugu at limixin getgesara, do kereva i lox avukat kopla xopmen. 14Do nege laradi ga xip gu mavana at na laabuxumpio la do laxao noxo rin asonao i, neni naba lok ka luunun tin. 15Ketla lugugu at lara do laxao na rin asonao i, neni noxo lok kaka tuunun; ketla neni xa naba roo ngan laradi ma lixilik na uu at laxao.16Miklen avukat pam i do, nemi xa laraugu laplavang at ne Moroa la Loroonan Kaala at ne Moroa i nemen keneng atnimi. 17Dola tara na sele utut kepe loogu laplavang at ne Moroa, Moroa naba lok kapmek box i, mila loogu laplavang at ne Moroa, i xaala la nemi vam nom laraugu laplavang teren.
18Nemen gat tara guta xarang axa i. Mo do tara xantubu atnimi i doxoma i do neni mo laradi akleklen ngan limixin at na lavatbung menemen, i epovo do neni na ke xepe mo lakleklen teren la na lok kaka lakleklen tuturun at ne Moroa. 19Limixin at na lavatbung menemen di lok do lakleklen atnedi i silok aleng tinotno, ketla nom lakleklen atnedi i lok ngan mun lavanga gamasa at lemeren ne Moroa. I ngan Lovoang Kaala i tong i xeretna,
“Moroa i vuulu lugugu at limixin akleklen.” a
20La at lara lenep bok keneng at Lovoang Kaala i lok keretna,
“Ne Moroa ikleklen i do lodoxoma at limixin akleklen, i ngan lavanga gamasa.” b
21Kuren la nemen tara na lox aurut laasen at laradi gomgo at lotu mila nedi axap di lok tooro nimi ngan lavasaxaruki. 22Pol mi ne Apolos la ne Pita; la lempanga at na lavatbung menemen, la lorooro, la lanmet, la mo lempanga ik lok ningina la mo lempanga axap naba ravasu melemu; na axap ne Moroa ga lok li i xusu ri lok tooro nimi. 23Ketla na i ruturun dola nemi at ne Karisito, la ne Karisito at ne Moroa.
Copyright information for
MMX